Makada 19 wa Chadema waachiwa huru Mwanza

 

Viongozi na wanachama 19 wa Chama cha Demokrasia na Maendeleo (Chadema) waliokuwa wakikabiliwa na shtaka la kufanya fujo kwenye mkusanyiko wa kidini katika Kanisa Katoliki Parokia ya Kawekamo jijini Mwanza wameachiwa huru.

Washtakiwa hao wameachiwa huru leo Juni Mosi, 2022 na Hakimu Mkazi wa Mahakama ya Hakimu Mkazi Mkoa wa Mwanza,  Bonaventure Lema baada ya upande wa mashtaka kuwasilisha hati ya kutokuwa na nia ya kuendelea na shauri hilo namba 77/2021.

Kwa mara ya kwanza makada hao walifikishwa mahakamani Agosti 19, 2021 wakidaiwa kutenda kosa hilo Agosti 15, 2021 baada ya kuhudhuria ibada ya Jumapili katika Kanisa Katoliki parokia ya Kawekamo wakiwa wamevaa sare za chama chao na fulana nyekundu zilizoandikwa Katiba Mpya.

 

Walioachiwa huru ni pamoja na Katibu wa Chadema Kanda ya Victoria, Zakaria Obadi, Deus Shinengo, mang’ombe Oswald, Kelvin John, Farida Gilala, John Nyamhanga, Emmanuel Mtani na Frank Nyamuga.

Wengine ni Msafiri Nteminyanda, Musa Kimweri, Gadson Jacob, Elieza Mkungu, Dionise Edward, Michael Christian, Leah Joseph, James Mayala, Yasinta Wachelele na Eudia Frank. Washtakiwa wote walikuwa wanawakilishwa na Wakili Erick Muta.

Akisoma hati ya mashtaka wakati shauri hilo lilipofikishwa mahakamani kwa mara ya kwanza Agosti 19, 2021, Wakili wa Serikali, Bisela Bantulaki alidai mbele ya Hakimu Mkazi Emmanuel Lukumay kuwa washtakiwa walitenda kosa hilo Agosti 15, 2021 katika Kanisa Katoliki Parokia ya Kawekamo Wilaya ya Ilemela jijini Mwanza.

Wakili Bantulaki alidai kwa pamoja, washtakiwa ambao wote walikana mashtaka dhidi yao walifanya fujo wakati ibada ya matoleo ikiendelea.

Akizungumza mara baada ya wanachama hao kuachiwa huru wakili Erick mutta amesema kesi hiyo imeondolewa  kwa hati ya kufutiwa mashtaka iliyoletwa na jamhuri  na wao wamepokea uamuzi huo mahakamani hapo na kusema kwa sasa watuhumiwa wote 19 wapo huru na wanaruhusiwa kuendelea na shughuli zao .

kwa upande wake mwenyekiti wa BAVICHA taifa, John Pambalu, amempongeza mwanasheria  Erick Mutta, kwa kazi kubwa aliyoifanya  mahakamani kuwawakilisha  niwanachama waliokuwa wanakabiliwa na kesi hiyo.

Pambalu amesema BAVICHA inatoa wito kwa Jamhuri, kuendelea kufuta kesi za kisiasa ambazo zinawakabili viongozi na wanachama wa chadema  katika uchaguzi wa mwaka 2020,baada na kabla ya uchaguzi huo.

“zipo kesi nyingi kama kesi ya mauaji inayomkabili  george sanga na wenzake kule njombe, ipo kesi ya aliyekuwa diwani wetu kule  Mpanda, na kesi nyingine nyingi ambazo bado zinawakabili wanachama wetu” amesema Pambalu

“tunataka jamhuri iweze kuziondoa na waliokwisha kuhukumiwa waachiwe huru ili waweze kuendelea  na maisha yao “

 Aidha amesema kazi yao kama BAVICHA ni kuendelea kuwatia moyo watuhumiwa, mahabusu pamoja na wafungwa  ambao wapo mahahamani kwa sababu za kisiasa

“tunatamani kuanza upya kwa kuachilia  na kufuta kesi zote za kisiasa” 

Washtakiwa wote walikuwa nje kwa dhamana baada ya kutimiza masharti ya mdhamini aliyesaini hati ya dhamana ya Sh1 milioni, barua ya utambulisho kutoka ofisi ya Serikali ya Mtaa na nakala ya kitambulisho cha mpigakura au cha Taifa.