Marufuku kusafirisha mazao bila kuwa na kibali:Bashe

Waziri wa Kilimo, Hussein Bashe amevitaja vibali stshiki ambavyo anatakiwa kuwa navyo mfanyabiashara ili aruhusiwe kusafirisha mazao.

Bashe amesema vibali hivyo ni pamoja na kibali cha kusafirisha mazao nje ya nchi na cha usafi wa mazao (Phytosanitary) huku akiwataka wafanyabiashara wa mazao kutafuta vibali hivyo kabla ya kuanza kuyanunua kwa wakulima  

Bashe ametoa agizo hilo kwa wafanyabiashara katika kikao chake na Vyombo vya Habari kilicholenga kutoa suluhisho kwa malori  yaliyokwama mipakani hususan mpaka wa Tanzania na Kenya- Namanga ambapo kuna malori zaidi ya 40 yamekwama yakiwa yamebeba mazao mbalimbali.

Bashe alisema, imekuwa ni tabia kwa wafanyabiashara hao kuanza kukusanya mazao ya wakulima bila ya kuwa na vibali vya kuyasafirisha na kisha kuanza kutafuta vibali wakifika mpakani.

Alisema, tukio hilo ni mara ya pili kutokea ambapo kwa awali lilipotokea serikali iliwasamehe na kuruhusu kusafirisha mazao na tukio la sasa pia inawasamehe wasafirishe mazao lakini amewakanya kuwa haitokuwa na msamaha tena.

“Hili tukio la sasa hivi ni mara ya pili linajitokeza ambapo awali walisamehewa na kwa kuwa serikali haitaki kuwaumiza wakulima kwa kuzuia kusafirishwa kwa mazao hayo na hili la sasa tunawasamehe, ila iwe ndiyo mwanzo na mwisho wakirudia tena mazao yao yote tutachukua.” alisema Bashe.

Alisema vibali vinatolewa bure kwa njia ya mfumo ATMIS mtandaoni hivyo hakuna sababu ya wafanyabiashara hao kukwepa kutafuta huku akiwataka pia kuwa na vibari vya tathmini ya mazao.

Alisema faida ya kuwa na vibali hivyo ni kuwezesha kupatikana kwa takwimu sahihi kuhusu kiwango cha mazao kinachosafirishwa nje ya nchi na nchi yanapokwenda ili kuondoa mwanya wa watu wengine kupeleka mazao yasiyokuwa na kiwango kwenye nchi hizo kisha kusingizia kuwa yametoka Tanzania.

Kutokana hali hiyo Bashe alisema kuwa serikali  haitosita kuyachukua mazao yatakayokamatwa tena siku nyingine yakisafirishwa bila vibali