Gesi yamuua mwalimu Morogoro, polisi watilia shaka

Mwalimu wa shule ya sekondari Morogoro, Daudi  Senyagwa amefariki  baada ya nyumba aliyokuwa akiishi mtaa wa Seminari kata ya Kingoluwira manispaa ya Morogoro kuteketea kwa moto tukio ambalo polisi wamelitilia shaka.

Baadhi ya mashuhuda wa tukio hilo, akiwemo balozi wa nyumba kumi katika eneo hilo, Gregory  Tandu amesema saa tano usiku alipigiwa simu na jirani yake kuwa nyumba ya jirani yao kuna moto na alipofika alishuhudia moto na gari ndogo ya mwalimu ikiwa imeegeshwa nje.

"Hakukuwa na dalili ya mtu yeyote kuzunguka eneo hili, tukampigia simu mwenyekiti ambaye  aliwapigia simu polisi kuwaarifu moto ulikuwa mkubwa na kulikuwa na dalili kama ya mlipuko," amesema.

Mwenyekiti wa chama cha walimu manispaa ya Morogoro, Gaspar Jaka amesema  wamepokea taarifa za tukio hilo kwa masikitiko ikizingatiwa mwalimu huyo alikuwa mwadilifu na mchapakazi.

"Mwalimu alikuwa anafundisha somo la Jiografia sekondari ya Morogoro, kifo chake kimetutia simanzi kubwa sana na pengo lake sio rahisi kuzibika,"amesema Jaka.

Mkuu wa upelelezi wa makosa ya jinai Mkoa wa Morogoro, Ralph Meela aliyefika eneo la tukio amesema taarifa za awali zinaonesha kifo cha mwalimu huyo kimesababishwa na gesi.

Hata hivyo, amesema wana mashaka na tukio hilo kutokana na kukuta mlango wa nyumba ya mwalimu ukiwa wazi huku funguo wa nyumba zikining'inia kwenye kitasa nje ya mlango.