Mauaji ya mapadri Askofu Nkwande afunguka

 

Askofu wa Jimbo Katoliki Mwanza, Renatus Nkwande ameziomba taasisi za elimu na dini nchini kufundisha upendo ili kuondoa ubinafsi, ukatili na roho ya mauaji inayosababisha vifo vikiwemo vya mapadri nchini.

Akizungumza jijini Mwanza katika maadhimisho ya siku ya somo ya  Chuo Kikuu cha Mtakatifu Augustino (Saut), Askofu Nkwande alitaja sababu nyingine ya mauaji nchini kuwa ni jamii kukosa hofu ya Mungu.

Ameziomba taasisi za elimu na dini nchini kuhimiza upendo, kujaliana, kudhibiti uhuru uliopindukia huku akiitaka jamii kuachana na ukatili unaosababisha roho ya mauaji.

"Tunapaswa kujilea na kujilinda katika taasisi za elimu ya juu na kati ndiyo mahala ambapo mbali na taaluma, pia mtu anafundishwa maadili ya kumuheshimu na kumuogopa Mungu," amesema Askofu Nkwande.

Awali, makamu mkuu wa Saut, Profesa Costa Mahalu amesema ili kuhimiza maadili katika jamii kila mwanafunzi katika chuo hicho anafundishwa kozi ya maadili ya jamii ili kumfanya ajitambue, upendo na kuithamini jamii.

Amesema ili kuziishi falsafa za Padri Augustino wa Hippo ambaye jina lake kilipewa chuo hicho, chuo kimekuwa kikitoa mafunzo na semina mara kwa mara kwa wanachuo ili kutambua wajibu wao kwa jamii.

 

"Tunawahamisha wanachuo wetu kuziishi ndoto za Mtakatifu Augustino ikiwemo upendo kwa sababu chuoni ni sehemu ya malezi na makuzi kwa vijana. Tusipende kuwahujumu watu bali tuwe wapenda haki,"amesema Profesa Mahalu.

Mtakatifu Augustino wa Hippo alizaliwa mwaka 354 baada ya kuzaliwa kwa Yesu na maadhimisho ya kumkumbuka  yakifanyika jana na wasomi, viongozi wa dini na wanafunzi zaidi ya 660 wa chuo hicho kushiriki.

Matukio ya mauaji ya mapadri

Juni 11, 2022 Padri wa Kanisa Katoliki Jimbo Kuu la Mbeya, Michael Samson wa Shirika la Wamisionari wa Afrika alidaiwa kuuawa baada ya mwili wake kukutwa katika mto Meta maeneo ya Sabasaba jijini Mbeya.

Aprili 15, 2022 Paroko wa Parokia ya Mbezi Mshikamano, Padri Francis Kangwa (49) aliuwawa na mwili wake kukutwa katika tenki la maji lililokuwa nyuma ya makazi ya mapadri katika mtaa wa Ottoman jijini Dar es Salaam.