Taarifa kutoka jeshi la polisi mkoa wa Mwanza

Jeshi la Polisi Mkoa wa Mwanza linawashikilia watuhumiwa  wa makosa mbalimbali ya kiuhalifu.

Tukio la kwanza.

Ndugu waandishi wa Habari, tarehe 05.07.2022 majira ya 12:30hrs mchana huko eneo la pamba road sokoni Wilaya ya Nyamagana, Mkoa wa Mwanza, Jeshi la polisi lilimkamata Said Furaha Miaka 31, Msukuma, Mkazi wa Nundu, Mfanya biashara, kwa kosa la kupatikana na jezi bandia dazani 145 zenye nembo ya club ya simba zinazo milikiwa na kampuni ya VUNJA BEI na jezi dazani 151 zenye nembo ya Club ya Yanga zinazo milikiwa na kampuni ya GSM, kitendo ambacho nikinyume na sheria.

Awali Jeshi la Polisi lilipata taarifa toka kwa afisa masoko wa kampuni ya GSM na VUNJA BEI kuwa hapa Jijini Mwanza kuna mfanya biashara anaesambaza na kuuza jezi bandia. Baada ya taarifa hizo ufatiliaji wa kina na haraka ulifanyika na kufanikiwa kumkamata mtuhumiwa tajwa hapo juu akiwa na jumla ya dazani 296 bandia za club ya Simba na Yanga dukani kwake.

Aidha, Jeshi la Polisi Mkoa wa Mwanza linaendelea na upelelezi wa kina kuhusiana na shauri hili ili kuweza kubaini mtandao mzima wa wahusika wote wanao tengeneza, kuagiza na kuingiza nchini bidhaa hizo bandia, ambapo inapelekea wadhamini wa club hizo kukosa mapato. Upelelezi wa shauri hili unakamilishwa mara moja na mtuhumiwa atafikishwa Mahakamani haraka iwezekanavyo.

Tukio la Pili.

Jeshi la Polisi Mkoa wa Mwanza linawashikilia watu wawili ambao ni Omary Lucas, Miaka 48, Mkazi wa Buhongwa  ambaye ni mume wa marehemu na Amos Lucas , Miaka 29, Mlinzi, Mkazi wa Isabenda kwa tuhuma za kosa la mauaji ya Elizabeth Lusana, Miaka 61, Mkazi wa mtaa wa Kagera, kata ya Lwanhima, Wilaya ya Nayamagana aliyeuawa mnamo tearehe 11.07.2022 majira ya 01:00hrs usiku kwa kukatwa na kitu chenye ncha kali maeneo mbalimbali ya mwili wake.

Uchunguzi wa awali umebaini wanandoa hao walikuwa na ugomvi uliotokana wivu wa kimapenzi ambapo mwanaume alikuwa akimtuhumu mke wake kuwa na mahusiano yasiofaa nje ya ndoa ulio pelekea mauaji hayo. Mtuhumiwa baadaya kutekeleza mauaji hayo alitoroka na kwenda kujificha Mkoani Tabora kwa Amos Lucas, lakini ufatiliaji wa Polisi uliweza kubaini mahali alipo na kuwakamata yeye pamoja na mtu aliyemficha.

  

Tukio la tatu.

Ndugu wanahabari, tarehe 12.07.2022 majira ya 19:19hrs usiku huko mtaa wa Nyabulogoya, kata ya Nyegezi, Wilaya ya Nyamagana, mtoto mwenye umri wa miaka 5 na nusu aitwaye Ally Sipendeki, mwanafunzi wa shule ya chekechea ya ST. Benedict English Medium –Nyegezi, alifariki dunia baada ya kuungua na moto kutokana na ajali ya moto ulionguza nyumba ya Pastory Nestory,  miaka 70, mwalimu mstaafu wa Nyabulogoya.

Moto huo pia umeteketeza mali za wapangaji watatu wa nyumba hiyo ambazo thamani yake bado kufahamika. Jeshi la Polisi Mkoa wa Mwanza kwa kushirikiana na Jeshi la Zima Moto na Uokoaji na vyombo vingine vya usalama lilifika kwa haraka eneo la tukio na kuanza kuzima moto huo kwa kushirikiana na wananchi kabla ya kuleta madhara makubwa.

Chanzo cha moto huo bado kinachunguzwa kwa kushirikiana na idara zinazo husika. Mwili wa marehemu umehifadhiwa Hospitali ya rufaa ya Bugando kusubiri uchunguzi wa daktari, baada ya uchunguzi kukamilika utakabidhiwa kwa ndugu kwa taratibu za mazishi. 

Jeshi la Polisi Mkoa wa Mwanza linawashukuru wananchi kwa kuendelea kutoa ushirikiano katika kutoa taarifa za uhalifu na wahalifu. Aidha Jeshi linazidi kutoa onyo kwa watu wenye kujihusisha na vitendo vya kihalifu kuwa hawatoweza kukwepa mkono wa sheria  kwa haliyoyote ile.

Imetolewa na;

Ramadhani H. Ng’anzi- SACP.

Kamanda wa Polisi (M) Mwanza.