Wakuu wa mikoa wapewa agizo anuani za makazi

 

Waziri wa habari, mawasiliano na teknolojia ya habari, Nape Nnauye amewataka wakuu wa mikoa yote nchini kufanya uhakiki wa takwimu za operesheni ya anuani za makazi katika mikoa yao hasa kipengele cha usimikaji wa miundombinu ya nguzo zenye majina ya barabara na mitaa pamoja na namba za nyumba.

Akizungumza kwenye kikao kazi na wakuu wamikoa kilichofanyika jijini Dodoma, waziri Nape amesema uhakiki huo ni muhimu kwa takwimu za usimikaji wa miundombinu hiyo zinaonesha zipo chini ukilinganisha na uhalisia wa kilichotekelezeka mikoa ambayo kwa nyakati tofauti yeye binafsi pamoja na viongozi wengine walipita kukagua na kuridhika na utekelezaji.

Amesema ifikapo mei 27 wizara hiyo itakuwa imepeleka fedha kwenye mikoa yote kwa ajili ya kufanya uhakiki na kuweka takwimu sawa kulingana na uhalisia, ili taarifa itakayowasilishwa ikiwa imesainiwa na mkuu wa mkoa husika iwe na sahii na ndio itakayokabidhiwa kwa Rais Samia Suluhu Hassan.

Kwa upande wake katibu mkuu wa wizara ya habari, mawasiliano na teknolojia ya Habari, Dk.Jim Yonazi amesema kazi ya utambuzi wa makazi ya watu ni moja ya eneo muhimu litakalosaidia nchi kuingia kwenye uchumi wa kidigitali, ambao hauna mipaka na unaoruhusu wananchi kujihusisha na shughuli za kiuchumi mahali walipo.