Familia nne mkoani Mwanza zakosa makazi nyumba ikibomolewa

 Familia nne zilizokuwa zikiishi katika nyumba moja iliyoko mtaa wa Isamilo Kaskazini 'B' kata ya Isamilo jijini Mwanza zimekosa mahala pa kuishi baada ya nyumba waliyokuwa wanaishi kubomolewa huku taarifa zikidai kwamba mmiliki wa eneo hilo alishaliuza kwa mtu mwingine anayehitaji kulibadilishia matumizi.

 Familia zilizoathirika kutokana na ubomoaji huo ni familia ya Happiness Lukenza aliyekuwa anaishi na mtoto wake mmoja, na wapangaji watatu ambao ni David Abel mwenye mke na watoto wawili, na wanafunzi wawili ambao ni Yassin Jafari na Enodius Eustard.

Kwa mujibu wa taarifa iliyotolewa na Mwenyekiti wa Mtaa huo, Athuman Butu, eneo hilo mali ya Happiness Lukenza na mmewe (Lucas) ambaye walitalakiana zaidi ya miaka sita iliyopita liliuzwa na familia hiyo huku mwanamke huyo akikataa kuondoka kwenye nyumba yake kwa kile anachodai kwamba hajaridhika na mgao wa fedha za mauzo ya nyumba hiyo.

Butu amesema kwamba nyumba hiyo ambayo tayari imebomolewa kuwa ofisi yake ilipokea amri ya mahakama ikimtaarifu juu ya zoezi la kuwaondoa na kuvunja nyumba hiyo jambo ambalo limetekelezwa leo mchana wa leo na mabaunsa waliokua wamevaa fulana zenye jina la US Born Security mgongoni ambao hawakuwa tayari kuzungumza.

Amesema baada ya kupokea barua hiyo amefika katika eneo hilo kusimamia uvunjaji na ubomoaji sambamba na kuhakikisha hakuna uharibifu na upotevu wa mali za wapangaji wa nyumba hiyo.

"Tulipokea wito wa kuhakikisha tunasimamia ili zoezi la kuwaondoa linafanyika kwa amani na utulivu na tumeshuhudia zoezi la uondoaji vitu na ubomoaji. Tumekuja kuhakikisha hakuna upotevu wa mali kwa sababu zoezi la kuondoa mali limefanyika wakati wapangaji wengine wakiwa hawapo," amesema Butu

Mpangaji katika nyumba hiyo, David Abel amesema alikuwa amelipa kodi ya miezi sita kwa ajili ya kuishi katika nyumba hiyo iliyokuwa inafikia ukomo Novemba mwaka huu.

Abel ametoa wito kwa wamiliki wa nyumba na mahakama inapotoa maamuzi ya migogoro inayohusisha makazi ifike na kutoa taarifa kwa wapangaji ili kuwaepushia wapangaji usumbufu huku akisema tukio hilo limeiacha familia yake bila mahala pa kwenda.

"Nina mke na watoto wawili ambao nilikuwa naishi nao hapa. Asubuhi tumeamka hatujui kinachoendelea ghafla wakaja mabaunsa wakaanza kutoa vyombo vyetu ndani na kupeleka nje wakati nimelipa kodi ya miezi sita Sh165,000 hii siyo sawa," amesema Abel

Kwa upande wake Mwanafunzi wa Chuo Cha Mwanza Drive kilichopo jijini hapa, Yassin Jafari amesema amehamia katika nyumba hiyo siku tatu zilizopita na kumlipa Happiness Lukenza Sh75,000 ikiwa ni kodi ya miezi mitatu.

Juhudi za kumpata, Happiness Lukenza ambaye alikuwa mmiliki wa eneo hilo kabla halijauzwa zimegonga mwamba kutokana na kutokuwa katika eneo hilo huku simu yake ikiita bila kupokelewa na taarifa zikidai kwamba anafuatilia barua ya kusitisha ubomoaji huo katika mahakama ya rufaa iliyoko mkoani hapa.